مدونة

هرمون السعادة

Picsart_24-05-05_12-14-46-697
الصحة النفسية

هرمون السعادة

من الحاجات اللي بتحسن الحالة المزاجية وتعمل كمضاد طبيعي ضد سوء او تقلب المزاج هي تعزيز هرمونات السعادة الاربعة اللي بيفرزها المخ وبتكون مسئولة عن #تحسين_المزاج و #تعزيز_المشاعر_الايجابية وهم :
1- هرمون السيروتونين
2-هرمون الدوبامين
3-هرمون الأوكسيتوس
4- وهرمون الإندورفين
الهرمونات دي ممكن نعزز عملها من خلال تنشيط بعض السلوكيات البسيطة والقادرة على تحسين الحالة المزاجية لنا زي مثلا :
1️⃣ #الرياضة_الخفيفة
ففي اثناء ممارسة المشي مثلا لمدة من 10 لـ 15 دقيقة يوميا حتى لو كان داخل البيت زي :
– المشي في المكان 🚶‍♀️
– عمل بعض تمارين الايروبكس الخفيفة
– الحركات الايقاعية – الرقص 💃
– حركة الجسم اثناء الصلاة .
– استخدام السلم بدل الاسانسير
ده كفيل انه يحسن الحالة المزاجية لك لو تم بإنتظام
طيب ايه اللي ممكن يساعدك في الحركة جوة البيت ؟
👇👇👇👇
– ممكن مشاركة اولادك في الوقت ده او الزوج 😁
– ارتداء حذاء رياضي خفيف اثناء عمل المهام المنزلية هايساعدك في الحركة اكثر – عن تجربة- (خصصي حذاء رياضي مخصوص للمشي داخل البيت حتى لو قديم شوية)
-ممكن تشغلي فيديو من علي اليوتيوب يساعدك في عمل الحركات الرياضية الخفيفة
ابحثوا عن لينكات واحفظوها علشان تبقي جاهزة عندكم عند احتياجها.

وياسلام لو يكون في مكان مفتوح يتخلله هواء متجدد وشمس 🌞
واللي يقدر يزود يرزح جيم ومشي في التراك .. بس خلينا نفتكر “ان خير الاعمال ادومها وان قل” 🚶‍♀️🚶‍♀️
ثاني حاجة ممكن تحسن الحالة المزاجية وتعزز نشاط هرمونات السعادة 😁

2️⃣ #نوعية_الاكل
طبعا الاكل الصحي والمتوازن بشكل عام بيساعد على تحسين وتعزيز الحالة المزاجية .. بس تحديدا في اكلات بتساعد على تنشيط افراز هرمون السعادة حسب كلام المختصين – اشهرهم في بيوتنا زي :
(الحمضيات زي البرتقال واليوسفي والجريب فروت – البطاطا – البصل – الثوم – الذرة – الشوفان – البقوليات – المكرونة – القمح (البليلة :)) -الحليب -الحمص وياسلام على حمص الشام خاصة في الشتاء – الحليب – المكسرات – وطبعا القهوة ☕️ خاصة الوسط المحوج لاني بحبها 😍
و طبعا انا بموووت 🧡 في الشكولاته الداكنة 🍫والفراولة 🍓
ثالث حاجة ممكن تحسن الحالة المزاجية وتعزز نشاط هرمونات السعادة 😁
3️⃣ #نور_الشمس و #الهواء_الطلق
انك تقضي وقت في الهواء الطلق ونور الشمس – عن تجربة – من احسن الحاجات اللي ممكن تحسن الحالة المزاجية ربع ساعة كل يوم بس ..
تقضيها في مكان مفتوح متجدد الهواء ومشمس حتى لو كان بلكونة بيتكم مع مشروبك المفضل وزرعتين حلوين في البلكونة 🌳☘️🌿🌲 كفيلة لتنشيط هرمون السيروتونين ورفع مستوى الاندروفين وتشعرك بالتحسن

4️⃣ الصحبة المؤنسة :
ان يكون لي اصحاب اجتمع معاهم من وقت للتاني .. اتكلم واسمع واتسمع نتبادل الضحكات والحكايات والاراء حتى لو في مواضيع بسيطة (مش ها نحل مشاكل الكون في القعدة دي) بس مجرد ان في حاجات ولو بسيطة تجمعنا ..المشاركة في حد ذاتها بتحسن من الحالة المزاجية
بس مهم اننا نختار الصحبة المؤنسة دي تبقى ناس عندها نفس النية فا بالتالي ها نقدر نساعد بعض ..واهم صفة مهمة في الصحبة علشان تبقى مؤنسة فعلا هي احترام خصوصية كل حد فينا ونحافظ فيها على المسافات الصحية من غير تطفل على حياة بعض.

5️⃣ الاسترخاء
خبراء الاسترخاء بينصحوا اننا نعمل بشكل يومي تمارين الاسترخاء لمدة 10 الي 15 دقيقة وده له فوايد كثيرة جدا اهمها طبعا تحسين المزاج – تقليل الشعور بالغضب او الارهاق – تحسين التركيز والتقليل من التوتر.. ده غير فوائده الجسدية زي تحسين التنفس والهضم والضغط وزيادة تدفق الدم إلى العضلات الرئيسية
الاسترخاء له اساليب كثيرة ابسطها :
– التنفس العميق ( محتاجين نكرره كذا مرة علشان نحس بمفعوله) خلي نفسكم طويل 4-7-8 😍

– التأمل
– اليوجا
– الموسيقى ( جربوا اسمعوا مقطوعات موسيقية في جو هادي واضاءة خفيفة هاتفرق معاكي جدا ودي بقى عن تجربة

– من الحاجات اللي بتفرق معايا جدا في تحسن الحالة المزاجية الروائح سواء كانت برفان معين انا بحبه او بخور وخاصة بقى رائحة العود والمسك الابيض ده مفضل عندي جدا ❤️ او الزيوت العطرية زي الخزامة او اللافندر رائع للاسترخاء وممكن تعطري منه مكان النوم بيساعدك على الدخول في النوم اسرع ..
– واخيرا قبل ما ننقل للنقطة اللي بعدها جربوا – الاسترخاء بالماء – لو اتيحت لك الفرصة في نزول حمام سباحة ..جاكوزي ..واذا لم لم تتاح الفرصة بانيو البيت مش هايقول لاء 😂 استثمري المتاح

6️⃣ قضي وقت مع الاطفال
طبعا مش قصدي الوقت اللي اغلبنا كا امهات بنقعده مع اولادنا واحنا بنصرخ فيهم علشان يشوفوا مذاكرتهم 😡 او يرتبوا غرفهم 👖👕 او علشان نسمعهم قصائد في التربية كالعادة 😆في ازاي يحترموا الكبار او بلاش يضربوا بعض 🕺
الوقت اللي قصدته انك تعيشي طفولتك معاهم .. انسي انك ماما في الوقت ده والعبي معاهم كا طفلة كبيرة شوية عنهم.. اضحكي من قلبك ❤️ ..العبي من قلبك ..هزري ونكتي معاهم من قلبك ❤️هايفرق معاك اوي وهايفرق كمان معاهم وهايخليهم دائما حريصين على انهم يحافظوا على رضاك علشان تلعبي معاهم👩‍👩‍👧
ولو لسه مش عندك اطفال اعملى ده مع اطفال اخواتك او قرايبك ان امكن

7️⃣مارسي هواية و اتعلمي حاجة جديدة
انك تمارسي هواية بتحبيها وبتستمتعي وانت بتعمليها من الحاجات المهمة اللي بتساعدك على تجديد وشحن طاقتك من جديد والتخلص من العصبية والضغوط اللي بتمري بيها خلال اليوم واحداثه .. صعب انك تنسي نفسك في ساقية الحياة اليومية المتكررة بدون اخذ وقت لنفسك – Time Break ☕️🍪
وطبعا كثير نفسنا بتراوغنا انه مافيش وقت مافيش فلوس لهوايات اومحدش هايديني فرصة
بس خلينا نعترف لبعض بسر 🤫🤫 ” اننا لما بنعوز نعمل حاجة بجد هانعملها ” 😆 💪
ومافيش اهم من الاعتناء بنفسي 🧡

 

8️⃣ تغذية الجانب الروحاني :
يهدّئ النفس ويصفيها من الهموم والمشاغل الدنيوية ويزرع الطمأنينة والسكينة فيها .. جربي تبدئي يومك بجلسة روحانية مع الله سبحانه وتعالي سواء بعبادة جسدية زي الصلاة او الصوم او بعبادة قلبية زي الذكر والمناجاة

خلاصة الكلام : عايزة اقولك اهتمي بنفسك وبإسعادها في كل فرصة ولو مافيش فرصة اخلقي انتي الفرصة دي لنفسك لانك تستحقيها .. والاهتمام مش بس بالجمال والاناقة … الاهتمام بإسعاد نفسكِ وتطويرها وتطيبها بكل طيب

اترك تعليقك

لن يتم نشر عنوان بريدك الإلكتروني. الحقول الإلزامية مشار إليها بـ *